كوريا الجنوبية .. تجربة جديرة بالدراسة
ــــــــــــــــــــــــــــــــــــــــــــــــــــــــــــــــــ
– تجربة من أغرب التجارب الإقتصادية اللى مر بيها التاريخ و نجاحها فى حد ذاته يعتبر معجزة عجز الإقتصاديين عن تفسيرها و أرجعوا ده لوعى الشعب الكورى و إرادته لإن كل المعطيات قبل نهضة كوريا كانت لا تبشر بأى خير لمستقبل البلد الأسيوى الصغير من أول المساحة .. للموارد الطبيعية .. لعدد السكان الكبير .. للحروب المستمرة .. للإحتلال شبه المستمر لأراضيها .. للطبيعة الجغرافية الوعرة و الصخرية و الجبلية اللى بتمثل أغلب مساحتها .. حاجة كده خلت كل الإقتصاديين لا يتنبئوا بأى خير فى المستقبل القريب أو البعيد لكوريا .
– سنة 1961 وقف الزعيم الكورى #بارك_شونج_هى أمام الشعب و تعهد بتبنى خطة للنمو الإقتصادى إبتداءاً من 1962 و حتى 1966 و دى تعتبر حجر الأساس لأى نهضة إقتصادية حصلت فى كوريا بعد كده و ده تم طبعاً بالتعاون مع حكومة الولايات المتحدة الأمريكية و اللى ركزت أكبر دعمها فى مجالات المال و الأفكار و الموظفين يعنى إستثمرت حرفياً فى الشعب الكورى نفسه بالإضافة للمجالات المالية المعتادة .
– سنة 1962 تم تنصيب بارك شونج هى كرئيس للجمهورية رسمياً و بدأ العمل على نفض غبار سنين طويلة من التخلف و الحروب و الأزمات فكوريا الجنوبية كدولة و كشعب كانت من أفقر دول العالم و تشبه إلى حد كبير دولاً إفريقية حالية زى غينيا و غانا و زيمبابوى . – كوريا اللى نالت إستقلالها عن اليابان 1945 كانت دولة على هامش العالم تستدين بإستمرار و لا تنتج سوى 4 أو 5 منتجات أغلبها مواد أولية و إجمالى صادراتها لا يتخطى ال 24 مليون دولار و دخل الفرد فيها لا يتخطى ال 80 دولار و كملت عليها الحرب الأهلية الكورية سنة 1950 و اللى إستمرت 3 سنين بس و نتايجها كانت كارثية و تسببت فى خسائر مهولة بالنسبة لإقتصاد هش جداً وقتها زى الإقتصاد الكورى .
– خسائر الحرب طالت كل شيىء فى كوريا تقريباً على سبيل المثال :
* الخسائر البشرية اللى تخطت 1.3 مليون كورى بين عسكرى و مدنى
* 25 % من البنية التحتية للدولة إتدمرت .
* 40 % من الوحدات السكنية هدمت .
* 47 % من خطوط السكك الحديدية .
* 80 % من محطات توليد الكهرباء .
* 500 كيلو متر من الطرق خربت تماماً .
* تراجع دخل الفرد إلى 50 دولار بدلاً من 80 دولار .
* 68 % من مجموع المصانع أدى لتراجع الإنتاج الصناعى بنسبة 75 % و تراجع الإنتاج الزراعى بنسبة 65 %
و لتقريب الصورة فالخسائر المادية وصلت إلى 69 مليار دولار و ده يعادل 5 أضعاف الناتج الإجمالى الكورى وقتها إنتوا متخيلين إن دولة تقعد تشتغل و تنتج سلع و تؤدى خدمات لمدة 5 سنين بدول أى إدخار أو أى نوع من الرفاه الإجتماعى بس عشان تسدد تكلفة الحرب دى و بعد ال 5 سنين ما يعدوا نقدر نحسب أول دولار كربح لصالح الدولة الكورية و طبعاً مع معطيات زى اللى فاتت دى فكوريا الجنوبية دخلت مرحلة الإفلاس رسمياً و أصبحت دولة تعيش على المنح و المعونات و القروض .
– خسائر الحرب بس مش أبرز مظاهر الإعجاز الكورى ده فى عوامل بيولوجية كمان كانت واقفة ضدها زى :
* مساحة الأرض اللى بالتقريب 100 ألف كيلو متر مربع ” عشر مساحة مصر ”
* كمان تحيطها سلاسل جبلية بتمثل 70 % من مساحتها تعيق أى خطط إصلاحية مستقبلية فى مجال الزراعة و الصناعة .
* قلة الموارد الطبيعية و قلة مصادر الطاقة .
* الحروب المستمرة اللى كانت طرف فيها .
* عدد سكان مهول وصل دلوقت لأكتر من 52 مليون نسمة و بالتالى زحام شديد و تكدس سكانى و من المعروف أن العامل البشرى سلاح ذو حدين من الممكن أن يكون دافع للتقدم أو العكس فى حالة إهمال القدرات البشرية المهولة دى فتبقى عبء على الدولة .
– الإنطلاقة الحقيقية لكوريا بدأت من سنة 1971 لما الرئيس الكورى أطلق #حملة_المجتمع_الجديد اللى هدف فيها لتحسين الأوضاع المعيشية للأسر الزراعية و اللى تدريجياً إنعكس بشكل عام على كل المواطنين و أصبحت حملة إصلاحية تحت 3 مبادىء هى ( الإجتهاد و الإعتماد الذاتى و التعاون ) و نقدر نقول إن قاطرة النهضة الكورية كانت الزراعة لإن بعد نجاح الحملة دى كانت من نتايجها إن كوريا إكتفت غذائياً و ده أثر بشكل كبير على نفسية المواطن الكورى اللى لأول مرة من عقود يشعر بالأمن الغذائى و معاه تم توجيه أى عوائد أخرى للقطاع الإنتاجى و التعليم فتدريجياً تم تأسيس جيل متعلم ينتمى للبلد و تم زرع حب البلد داخله فى مراحل تعليمه الأولى و مع إحساس الشعب بنتائج مجهودهم و رؤيتهم له ظاهراً على كافة مناحى حياتهم إجتهد الشعب الكورى أكتر و توجه بشكل أكبر للصناعة و ساهم فى ده سياسة الرئيس الحكيمة اللى سماها #سياسة_التصنيع_للتصدير .
– لا يمكن إغفال دور الولايات المتحدة الأمريكية فى مسيرة تطور كوريا الجنوبية خصوصاً فى مراحلها الأولى و ده يرجع أساساً لإن بعد الحرب الأهلية و تقسيم كوريا إلى شمالية ( إنضمت للمعسكر الصينى و السوفييتى ) و جنوبية ( إنضمت للمعسكر الأمريكى ) و لإعتبارات سياسية وجدت أمريكا نفسها مضطرة لدعم كوريا الجنوبية بأى شكل لتكون موطىء قدم لها فى المعسكر الشرقى خصوصاً فى فترة ما بعد الحرب العالمية الثانية و ده تمثل فى منح و قروض ميسرة جداً و دعم لا محدود بالخبراء الإقتصاديين و حتى العسكريين و خبرات التدريب .
– تدريجياً تحولت كوريا من مجرد دولة زراعية أغلب بنيتها التحتية منهارة إلى دولة صناعية و تخلت عن أساس إقتصادها وقتها اللى هى تصدير المواد الأولية و بكميات تكاد لا تذكر و لجأت إلى تصنيع المواد الثانوية و تامة الصنع و قللت من معدل الإستيراد تدريجياً و رغم الإنهيار الحاد اللى حصل فى الإقتصاد الكورى نتيجة الأزمة الإقتصادية الأسيوية اللى بدأت فى تايلند سنة 1997 #الإثنين_الأسود و طالت كل الأسواق المالية الأسيوية إلا إن إبتداءاً من القرن العشرين بعد ما وقفت على أرض صلبة دخلت بقوة مجال الصناعات المتوسطة و الثقيلة زى صناعة السيارات و السفن و الفولاذ و البتروكيماويات بالإضافة لمجال الإليكترونيات اللى كانت بدأت فيه بالفعل من الثمانينات .
– من أبرز العلامات التجارية الكورية فى عصرنا الحالى :
ـــــــــــــــــــــــــــــــــــــــــــــــــــــــــــــــــــــــــــــــــــــــــــ
* سامسونج
* إل جى
* هيونداى موتورز
* كيا
* كوريا للطيران
* هيوماكس
* سانج يونج للسيارات
* دايوو
* إطارات هانكوك
الإقتصاد الكورى فى أرقام :
ـــــــــــــــــــــــــــــــــــــــــــــ
* الناتج المحلى الإجمالى : 1.393 ترليون دولار .
* الصادرات : 628 مليار دولار
* الواردات : 631 مليار دولار
* الدين الخارجى : دولة مانحة
* معدل التضخم : 0.7 %
* معدل النمو : 3.3 %
* الإحتياطى النقدى شاملة الذهب : 362.83 مليار دولار
* معدل البطالة 3.7 %
– تجربة كوريا تستحق كل إحترام نظراً لكم المعوقات اللى بدأت بيها فهى حرفياً بدأت من تحت الصفر لحد ما قدرت توصل فى 2015 إنها تكون الإقتصاد رقم 11 على العالم بناتج إجمالى 1.393 ترليون دولار و الذى زاد 31 مرة منذ نهاية الحرب الأهلية فى 1953 .
– شعب عظيم و قيادة سياسية و إقتصادية حكيمة و إنفتاح إقتصادى كبير و إرادة شعب قبل أى شيىء فمن مساحة صغيرة و فقر موارد و ضعف رقعة زراعية و خراب و دمار فى كل البنية التحتية تقريباً إلا أن كوريا إستطاعت و فى وقت قياسى من الستينات و حتى 1971 سنة بداية النهضة الفعلية إلى يومنا الحالى فى أنها تكتب إسمها بحروف من نور فى سجلات الأمم المتقدمة .
مراجع :
ـــــــــــــ