حقيقة فوائد ال 26 %
ــــــــــــــــــــــــــــــــــ
فيما يخص موضوع فائدة ال 26 % اللى إعلاناتها غرقت الشوارع الفترة اللى فاتت فالموضوع ملوش أى دعوة بمعدل الفائدة فى مصر لإن الموضوع له أسس و مينفعش أى حد سواء بنك أو شركة تطلع فى دماغها حاجة تقوم عاملاها .. هحاول ألخص الموضوع فى نقط إن شاء الله توضحلكم كل حاجة ..
* أولاً :
ـــــــــــ
– الموضوع مش شهادات إستثمار و لا ودائع إنما هو صندوق إستثمارى عقارى يتبع شركة النعيم القابضة للإستثمار و ده الويب سايت بتاعها ( http://www.naeemholding.com/ )
– الصندوق تم الإعلان عنه لأول مرة فى مارس و تم الإعلان عن تفاصيله الكاملة فى إبريل على لسان الرئيس التنفيذى للشركة السيد / يوسف الفار و هو عبارة عن شريحتين كل شريحة منهم بمليار جنيه تم فتح باب الإكتتاب الخاص للشريحة الأولى يوم 5 إبريل و استمر لمدة شهر http://cutt.us/XkOMG
* ثانياً :
ــــــــــــ
– قيمة الإكتتاب الخاص كان 10 مليون جنيه بحد أدنى و كان مخطط ليه 50 % من قيمة الصندوق و لو الإكتتاب الخاص مكملش 50 % فهيغيروا النسب و يخصصوا 20 % فقط للإكتتاب الخاص و يطرحوا ال 80 % الباقيين للإكتتاب العام للأفراد بحد أدنى 50 ألف جنيه و ده هيكون قبل رمضان فى الغالب ..
– الحقيقة أنا معرفش نتائج الإكتتاب الخاص كانت إيه لكن ممكن نستشف من الحملة الإعلانية اللى عملتها الشركة بالطريقة المبهمة دى إن الإكتتاب منجحش أوى و بالتالى فهما استهدفوا بالحملة دى لفت نظر المساهمين الأفراد عشان يكتتبوا فى الصندوق و يكملوا رأس ماله المعلن ..
* ثالثاً :
ــــــــــــ
– أهم نقطة عملت بلبلة بين الناس هو رقم 26 % اللى كان محطوط فى الإعلان دون أى تفاصيل أخرى مع وجود إسم بنك مصر على الإعلان مع وجود العلامة التجارية لشركة النعيم فى الإعلان برضه لكن الناس متعرفش غير شعار بنك مصر و بالتالى ربطوا بين النسبة و بين البنك و إن دى نسبة فوائد جديدة على شهادات إستثمار أو ودائع تابعة للبنك خاصة إنها جت بعد الحملة الإعلانية للبنك اللى أكدوا فيها للمصريين إن #طلعت_حرب_راجع .. زى ما قلت فى النقطة اللى فاتت فالإعلان بالشكل ده و بالصيغة دى كان على الأغلب مقصود عشان يعمل إنتشار كبير و بكده يكون الصندوق حقق هدفه من الوصول لأكبر عدد ممكن من الناس و بالتالى يشجعهم على الإكتتاب فى الصندوق ..
– يجب التنويه إلى إن النسبة دى ملهاش أى علاقة ببنك مصر و إن البنك دوره الوحيد هو دور وسيط لتلقى أموال الإكتتاب لصالح الصندوق و التعاقد بالكامل بيكون بين المستثمر و صندوق الإستثمار الخاص بشركة النعيم دون أى مسئولية على البنك و إنه لا يضمن لهم نسب الأرباح المعلنة ..
* رابعاً :
ـــــــــــــ
– الصندوق نفسه بعد ما الموضوع كبر و الناس كلها إتكلمت عنه بدأ يوضح أكتر إن النسبة المتفق عليها هى 10 % سنوياً و ال 16 % الباقيين بيبقوا عائد تراكمى للإستثمار بمعدل سنوى و بيتصرفوا فى نهاية مدة الصندوق ..
– طيب هل النسبة دى مؤكده .. يعنى لو سبت فلوسى معاكم لمدة 3 سنوات اللى هى الفترة الزمنية للصندوق فلوسى هتزيد بمعدل 26 % سنوياً ؟
الشركة ردت و قالت إن ده مش مؤكد و إن ده راجع لحالة السوق و إنهم مبينين حجم المخاطرة المتعلقة بالإستثمار فى الصندوق فى النشرة الخاصة بيه عشان كل عميل يعرف مدى الإستفادة و مدى المخاطرة من الإكتتاب فى الصندوق .. و من عندى أنا بقولكم إن ده شيىء صعب لأقصى درجة على الرغم من إن الشركة أعلنت إنها بالفعل بتملك عقارات من قبل التعويم فبالتالى نسبة الربح هتكون شبه مضمونة http://cutt.us/Zler
* خامساً :
ـــــــــــــــــ
– نسبة الفائدة البنكية المعلنة من البنك المركزى هى 14.75 % للإيداع و 15.75 % للإقراض و أى إرتفاع عن النسبة دى لازم يكون بحساب و أعتقد لازم يتاخد بيها موافقات أو ما شابه لإن أثر الإرتفاع ده على الإقتصاد بيبقى ضار جداً و ده اللى خلى الهيئة العامة للرقابة المالية تطالب شركة النعيم بإزالة الإعلان من الشوارع لمخالفتها المادة 100 من اللائحة التنفيذية لقانون سوق المال و اتهمتها بإن إعلانها يحتوى توقعات مبالغ فيها و إن فيه معلومات ذات تأثير مضلل زى ما نص المادة بيقول http://cutt.us/MS4S5
– ده أجبر بنك مصر إنه يطالب هو كمان بإزالة الإعلان لإن الناس بقت تسأل البنك عن موضوع ال 26 % و كانوا عاوزين يودعوا فلوسهم فى الوعاء الإدخارى الجديد ده فصرح البنك على لسان نائب رئيسه السيد / عاكف المغربى إن البنك لم يرفع معدل الفايدة و إن دوره بينحصر فى تلقى الإكتتاب مش أكتر http://cutt.us/KDrlQ
* سادساً :
ــــــــــــــــــ
– طب إيه سبب الهياج اللى حصل ده كله و هل من المنطقى إن ده كله يحصل بسبب إعلان واحد ؟
الحقيقة أه .. كل ده و أكتر كمان كان ممكن يحصل بسبب إعلان واحد زى اللى شفناه ده و ده لإنه مرتبط بسعر الفايدة اللى هى أهم أداة من أدوات السياسة النقدية و اللى بتحاول الدولة عن طريقها تحجيم الآثار السلبية للتضخم اللى نسبته تخطت ال 31 % دلوقت و ده معدل مرتفع بلا شك ..
– طب إيه الخطورة فى إرتفاع معدل الفايدة ل 26 % طالما إن ده هيحجم من التضخم ؟
إرتفاع النسبة للرقم ده هيقضى تماماً على الإستثمار لإن أى حد معاه فلوس هيقول بدل ما أشغلها بنفسى و أتعب أعصابى و فى الأخر ممكن متوفقش و أخسر فأنا هحطهم فى البنك و يجيلى نسبة ربح 26 % و أنا مرتاح .. طبعاً هيفضل معدل التضخم أعلى لكن الفجوة هتقل بالنسبة للى أودع فى البنك .. ده هيقضى على الإستثمار و يشجع على الإدخار فتتحول الفلوس كلها و تبقى مع الجهاز المصرفى و ساعتها هيكون مجبر على إستثمار الفلوس لسداد الفوائد العالية دى و حالة السوق زى ما حضراتكم عارفين غير مشجعة على ضخ إستثمارات جديدة بسبب إرتفاع الأسعار و الركود الحاصل بسببها ..
– طب إيه المانع ما الجهاز المصرفى ساعتها هيزود فائدة الإقتراض برضه و يكسب من فرق الإقراض و الإيداع ؟
الموضوع ده هيبقى صعب جداً لإن مين هيروح ياخد قرض عليه فوائد تقترب من ال 30 % مثلاً .. أنهى مشروع ده اللى يحقق صافى ربح 45 : 50 % مثلاً عشان بعد سداد فايدة البنوك يقدر المقترض يحقق أرباح و إيه هى إحتمالية نجاح المشروع ده من الأساس .. بالشكل ده محدش هيقدر يكسب غير تجار المواد غير المشروعة زى المخدرات و السلاح إلى أخره ..
* أخيراً :
ــــــــــــــ
– إحتمالية إرتفاع سعر الفايدة أكتر من كده صعب جداً جداً لإن حالة السوق متستحملش زيادة أكبر من كده و فى أخر إجتماع للبنك المركزى بعض الناس إعتقدت إن هيبقى فى زيادة منتظرة فى سعر الفايدة إلا إنى توقعت العكس و بأكد إن ده صعب جداً و أى زيادة جديدة فهو تهديد مباشر للإستثمار الوطنى و الأجنبى على السواء فى الوقت اللى أغلب دول العالم بتتجه لتقليل أسعار فائدتها لجذب إستثمارات جديدة إلى أراضيها ..
– محدش يا جماعة ينساق ورا الإعلانات المبهمة اللى بالشكل ده و اللى غالباً بيبقى الهدف منها إثارة بلبلة