إفلاس الدول

إفلاس الدول .. أسباب و نتائج
ـــــــــــــــــــــــــــــــــــــــــــــــــ

* تعريف الإفلاس :
ـــــــــــــــــــــــــــــ

( هو عدم قدرة شخص ما أو كيان ما على سداد إلتزاماته المالية تجاه دائنيه )

(( المدين و الدائن من الممكن أن يكونوا أشخاص طبيعية أو أشخاص إعتبارية أو حتى دولاً و إمبراطوريات ))

* الإفلاس إرتبط بأذهان الناس أكثر بالشركات فلو كانت شركة مثلاً تعمل فى مجال ما و توسعت فى الإقتراض على أمل السداد من الأرباح و مع الوقت حصلت ظروف أجبرتهم على عدم السداد فهنا بيوقع مجلس إدارتها إقراراً بالإفلاس و ده بيبقى اعتراف رسمى منهم بعدم قدرتهم على سداد ديونهم و عليه بيتم إتخاذ الإجراءات القانونية ضدهم بتصفية و بيع أصولهم لسداد أصل القرض و اللى المفترض إن قيمتهم أعلى من قيمة ما اقترضوه و لو مكفتش فالأمر برجع لإدارة البنك لإتخاذ الإجراءات اللى تناسبه سواء جدولة للديون أو إتخاذ الإجراءات القانونية على حسب نوع الشركة المقترضة إذا كانت مساهمة أو تضامنية أو توصية أو أفراد إلى أخر الأنواع .. ده النمط العادى اللى بيتبادر إلى ذهن أى حد بيسمع كلمة ( إفلاس ) .. طيب إيه هو إفلاس الدول ؟ و هل الدول فعلاً بتفلس ؟

* إفلاس الدول مبيختلفش من حيث التعريف و لكن بيفرق من حيث إجراءات التعامل معاه فإفلاس الشركات بينظمها قانون الإفلاس فى كل دولة حسب وضعها أما إفلاس الدول فمفيش جهة عليا تنظم مسألة السداد لإن الدولة نفسها مينفعش نصفيها و كل دائن ياخد جزء سداداً لدينه ..

* نرجع بقى لأصل المشكلة .. الإفلاس بيحصل ليه ؟ إيه أسبابه ؟

1 – لما دولة ما يكون إقتصادها ضعيف و غير منتج إيرادها بيقل و بالتالى مبتقدرش تدفع ثمن إحتياجاتها اللى بتستوردها من الخارج و لا بتقدر تصرف على خدماتها تجاه مواطنيها و معاها بيزيد معدل إقتراضها من الخارج أو من الداخل و ده بيحط عليها ضغوط بالتأكيد بسبب سداد أقساط القروض دى .. لما مبيكونش فى إدارة سليمة للقروض دى الإقتراض بيتكرر و العبء بيزيد بالتدريج لحد ما بتوصل الدولة إنها مبتقدرش تسدد ..

2 – تغيير النظام الحاكم فى الدولة بعد ثورة أو إنقلاب أو أى مسمى تانى و عدم إعتراف النظام الحاكم الجديد بالمديونية اللى تسبب فيها النظام القديم ..

3 – إحتلال الدولة أو غزوها بعد خسارتها لحرب مثلاً ..

* طيب لو حصلت أى حالة من الحالات دى الديون تسقط من على الدولة ؟

– بالتأكيد لأ .. إعلان الإفلاس مش معناه أبداً سقوط الديون و إلا مكانش حد غُلب و كانت دول كتير إقترضت و مسددتش ..

* إيه الإجراءات اللى بتتاخد بعد إعلان الإفلاس ؟

– أولاً لازم الدولة تعلن ده بنفسها و إن إقتصادها مبقاش قادر على السداد .. بعدها تبدأ الجهات الدائنة تتواصل مع الدولة نفسها للوصول لحل يرضى جميع الأطراف و الحلول نفسها بتختلف حسب سبب حدوث الإفلاس نفسه يعنى مثلاً :

– فى حالة زيادة الديون بيتم الإتفاق على زيادة مدة السداد أو فترة سماح إضافية أو حتى قروض جديدة مع شروط تقشفية أقسى ..

– فى حالة تغيير النظام بثورة بيتم الإتفاق على تخفيض نسب الفايدة أو تخفيض المديونية نفسها و بيدعم ده إن النظام الجديد بيعتبر النظام السابق نظام فاسد و تسبب بفساده فى اللى حصل فبيطلبوا التخفيض بقلب جامد شوية .. طبعاً مش بالضرورة طلباتهم تتنفذ لكن فى الأخر بيبقى فى صيغة أخف وطأة من الحالة الأولى ..

– فى حالة الإحتلال أو الغزو بعد خسارة حرب فبتتحول كل مديونيات الدولة المهزومة إلى الدولة المنتصرة و بيتوجب عليها السداد .. حاجة كده زى إندماج الشركات لما شركة ناجحة بتستحوذ على شركة خسرانة ..

* هل المسألة بتنتهى بالتفاوض و لا فى إجراءات أقسى ممكن تتاخد ؟

– طبعاً التفاوض بيبقى خطوة أولى لتجنب أى إجراءات أقسى من كده لإن فى حالة عدم التوصل لحل بالتفاوض فالدول الدائنة بتلجأ للحلول الصعبة زى فرض حظر على التبادل التجارى مع الدولة الغير ملتزمة و ممكن إستصدار قرار بيه من الأمم المتحدة لو لزم الأمر ..

– لو متمش الإتفاق بعد الحل ده فالدول الدائنة اللى غالباً بتبقى متقدمة تكنولوجياً و عسكرياً بتلجأ لأصعب و أخر حل و هو إعلان الحرب و إحتلال الدولة المدينة و ده بالمناسبة حصل معانا فى مصر عام 1882 لما توسع #الخديو_إسماعيل فى التطور العمرانى فى مصر معتمداً على طفرة أسعار القطن المصرى و لكن مع الوقت سعر القطن عالمياً نزل فبالتالى لقى نفسه مديون ب 19 مليون جنيه و ده مبلغ كان خرافى وقتها و ده خلى بريطانيا تحتلنا و تفرض الوصاية علينا ..

* هل فى إيجابيات للإفلاس و لا كله سلبيات ؟

– طبعاً بيبقى فى تبعات لقرار إعلان الإفلاس أغلبها سلبى بالطبع ..

– السلبيات :
ــــــــــــــــــــ

1 – فقدان الثقة فى إقتصاد الدولة تماماً ..

2 – عدم قدرة الدولة على الإقتراض من جهات رسمية أو حتى غير رسمية لحين توفيق أوضاعها ..

3 – إنخفاض معدل التبادل التجارى بين الدولة و أغلب دول العالم لخوف المصدرين و المستوردين من التعامل مع إقتصاد مفلس ..

4 – ضعف قيمة العملة الوطنية بشكل كبير و بالتبعية إنخفاض قيمة مدخرات الشعب و زيادة التضخم و زيادة الأسعار ..

5 – فقدان البنوك لجزء كبير من رأس مالها بحكم انها المستثمر الأول فى السندات الحكومية المصدرة من الدولة ..

6 – بخلاف البنوك المحلية فأى مستثمر خارجى فى سندات الدولة المفلسة هيتعرض لنفس الخسارة و الخسارة بالطبع مؤقتة لحين التوصل لحل ..

7 – هروب المستثمرين الأجانب من السوق المحلى و تحويل أغلب أرصدتهم أو كلها لو قدروا للخارج ..

– الإيجابيات :
ــــــــــــــــــــ

1 – إعفاء الدولة مؤقتاً من سداد أقساط الديون و ده بيديها فترة لترتيب البيت من الداخل و إعادة إصلاح ما يمكن إصلاحه ..

2 – الدولة بتكون فى موقف قوى نسبياً أثناء التفاوض لإن مصلحة الدائنين بتتمثل فى إستردادهم لأموالهم و بالتالى قدرة الدولة المفلسة على التفاوض على أحسن شروط ممكنة للسداد ..

* إيه هى تبعات الإفلاس داخلياً ؟ هل فى إجراءات الدولة بتاخدها لحماية نفسها ؟

– بالتأكيد فى إجراءات الدولة بتاخدها و بتتراوح فى قسوتها حسب سوء الوضع نفسه فمثلاً :

– البنك المركزى ( غالباً ) بيجمد الحسابات الدولارية و بيحظر تحويلاتها عشان يحمى رصيده اللى بالتأكيد بيبقى قليل من التحويل للخارج .. المستثمرين الأجانب بالذات بيبقوا خايفين و عاوزين يحولوا كل أرصدتهم بره و لو تم السماح ليهم مش هيفضل فى البنوك و لا دولار واحد ..

– البنك المركزى بيقلل حدود السحب من ماكينات الصرف الآلى لتحجيم عمليات السحب المتوقعة ..

– الوضع العام وقتها بيجبر أى حكومة على إتخاذ إجراءات تقشفية حادة لمواجهة طوفان من عدم الإستقرار المالى فى الفترة التالية لقرار الإفلاس ..

– غلاء الأسعار و إنخفاض القدرة الشرائية للعملة المحلية و زيادة الطلب على السلع الأساسية ..

– حالة رعب و خوف على المدخرات و التوسع فى الشراء لأى منتج حتى مع عدم الحاجة ليه ..

– رواج شديد جداً للسوق السوداء و إرتفاع فى سعر العملات الأجنبية خصوصاً الدولار ..

* إيه أشهر النماذج للدول اللى أعلنت إفلاسها قبل كده ؟

– الحقيقة الإفلاس مرض أصاب دول كتير و ميعتبرش شيىء نادر الحدوث .. أخر 200 سنة على سبيل المثال أعلنت 83 دولة إفلاسها على الأقل مرة و بيتربع على قمة قائمة الإفلاس #الإكوادور و #بيرو و #فنزويلا و دول أعلنوا إفلاسهم 10 مرات يليهم دول زى #روسيا و #إسبانيا و #البرازيل و #المكسيك و #تشيلى و دول أفلسوا 9 مرات و غيرهم طبعاً كتير ..

من أشهر الدول دى :

– الولايات المتحدة الأمريكية .. 5 مرات
– روسيا .. 9 مرات
– ألمانيا .. 8 مرات
– الصين .. 4 مرات
– بريطانيا .. 4 مرات
– اليونان .. 4 مرات
– اليابان .. مرتين

* المقصود هنا هو إن الإفلاس يعتبر حادث عارض فى تاريخ الدول و يعتبر مألوف كمان بالنسبة لبعض الدول المهم إن مع قرار زى ده لازم يتاخد قرارات إصلاحية سريعة تقدر تعدل كفة ميزان الإقتصاد زى ما عملت دول زى روسيا و #أيسلندا و #الأرجنتين أشهر مثال على النهوض من الإفلاس و اللى عن طريق رئيسها #نيستور_كيرشنير قدرت إنها تعدل ميزان الإقتصاد بسرعة على الرغم من إستمرار أزمة ديونها ..

* أخيراً .. الديون لا تسقط بالتقادم و لا بإعلان الإفلاس و الدول الدائنة ضامنة إنها هتسترد حقوقها بأى شكل من الأشكال سواء بالحلول الودية و التفاوض أو حتى بالحروب و مهما طالت فترة السداد ففى النهاية لازم الدول المدينة تسدد و خير مثال على ده بريطانيا اللى سددت عام 2006 قسط بقيمة 84 مليون دولار كأخر قسط من قرض قيمته 4.34 مليار دولار كانت إقترضته من الولايات المتحدة عام 1945 بعد نهاية الحرب العالمية الثانية .. المبلغ مش قليل بالمناسبة فالمبلغ يعادل 140 مليار دولار بأسعار دلوقت و ده كان بيمثل ضعف حجم الإقتصاد البريطانى وقتها ..

ــــــــــــــــــــــــــــــــــــــــــ