نماذج من الأبطال الشعبيين

نماذج من الأبطال الشعبيين
ـــــــــــــــــــــــــــــــــــــــــ

غالبية البشر منذ بدء الخليقة بتكره الظلم و الفساد .. فطرة بشرية ربنا بيخلقها فى البنى أدم .. تكره الظلم أه لكن تواجهه لأ .. تكره الفساد أه لكن تشارك فى القضاء عليه لأ .. تميل للثورة على الطغيان أه لكن تتصدر صفوفها لأ .. عشان كده غالبية البشر دى بتتمنى ظهور شخص يواجه بنفسه الظلم و الفساد و يثور عليه و بالتالى هما يستفيدوا من النتايج الإيجابية لتحركه و هو اللى يشيل أى عواقب لتصرفه ده .. تفكير أنانى و سلبى شوية لكن هو ده الواقع و مفيش قدامنا غير إننا نقبله .. عشان كده التاريخ دايماً بيذكر أسماء معينة و بيسلط الضوء عليها .. لإنهم فلتات مش بتتكرر كتير .. أحياناً بتبقى شخصيات حقيقية و أحياناً بتبقى شخصيات خيالية لكن بتترسخ فى نفوس الناس بمرور الزمن و بتتعامل معاملة الشخصية الحقيقية ..

و موضوع الأبطال أنصار الضعفاء و أعداء الظلمة ده متكرر فى دول و ثقافات كتير أوى و يكاد يكون متكرر بنفس التفاصيل تقريباً .. فى الغالب القصة بتكون بالشكل ده .. نظام ظالم بيضم النخبة السياسية و الإقتصادية من حكام و تجار و إقطاعيين و قطاع عريض جداً من الفقراء و المعدمين اللى بيدفعوا فاتورة الظلم ده و بين الشريحتين دول بيظهر البطل اللى بيحاول يرجع ميزان العدالة لوضعه الطبيعى و اللى غالباً بيكون من الطبقى الوسطى أو الطبقى العليا بس بيتمرد عليها .. الكلام ده مش مقتصر على عرق أو لون أو دين أو منطقة جغرافية .. العالم كله تقريباً مر بنفس الظروف و إتحفر فى وجدان شعوبه ظاهرة البطل نصير الغلابة و محب العدالة ..

ـــــ

لو بدأنا بمصر مثلاً فأشهر الأمثلة هو #على_الزيبق .. و رغم إن على الزيبق تاريخياً إتولد و عاش فى بغداد إلا إن إنتاج المسلسلات و الأفلام عنه خلى الناس تفتكر إنه مصرى و محدش عارف لحد دلوقت هل القصة مؤلفة و لا الشخصية حقيقية بالفعل .. المهم إن على الزيبق كان نموذج للبطل اللى بيهين السلطة الظالمة الممثلة فى المقدم سنقر الكلبى و المقدمة دليلة و بيهز صورتهم و هيبتهم فى عيون الناس و بالتالى بيشجع عامة الناس على التجرؤ عليهم و الإستهزاء بيهم ..

مثال مصرى تانى هو #أدهم_الشرقاوى و اللى الروايات تضاربت عنه رغم إنه شخصية حقيقية .. روايات عملت منه بطل شعبى نصير للفلاحين و إنه كان بيسرق الأغنياء و الإقطاعيين و يبتزهم و بعدين يفرق الفلوس دى على الفقراء و دى الرواية الشعبية اللى بيتداولها الناس .. و رواية تانية مطلعاه قاتل و خارج عن القانون و دى الرواية اللى تبناها الإنجليز و أجهزة الشرطة و ده يمكن عشان ميتحولش لبطل يقلده الناس مع الوقت .. و رواية تالتة بتقول إنه كان بطل شعبى فعلاً و لكنه وجه نشاطه الثورى ضد الإنجليز فكان بيقتل العساكر و القيادات البريطانية .. و رغم إن كل رواية ليها وجاهتها إلا إن اللى ثبت فى دماغ الناس الرواية اللى بتقول إنه كان نصير للغلابة و المظلومين ..

ـــــ

طب لو خرجنا بره نطاق المحلية و بصينا على العالم هنلاقى إن أهم أيقونة ثورية فى العالم الغربى هى شخصية #جاى_فاوكس – #Guy_Fawkes و ده ثورى إنجليزى كاثوليكى عاش فى القرن ال 16 و عاصر صعود الكنيسة البروتستانتية و شاف الإضطهاد اللى عاشه الكاثوليك على يد الملك جيمس الأول فقرر هو و 8 من الثوريين تفجير مبنى البرلمان يوم 5 نوفمبر 1605 و الملك جيمس جواه بعد ما يلبسوا أقنعة تخفى هويتهم فيما عرف بإسم #مؤامرة_البارود .. الخطة فشلت و الحكومة إكتشفتهم و تم الحكم عليهم بالإعدام و لكن ظل جاى فاوكس و قناعه رموز للثورية لحد يومنا الحالى .. و بالمناسبة جاى فوكس هو محور فكرة الفيلم العظيم #V_for_Vendetta إنتاج سنة 2005 و صورة القناع بتاعه هى صورة البوست ده ..

مثال تانى مهم هو #روبن_هود – #robin_Hood و ده شخصية خيالية إنجليزية البعض بيقول إنها حقيقية بالأساس و لكن مفيش دليل قطعى على كده .. القصة معتادة .. بطل شجاع عاش فى أوائل القرن ال 13 بيساعد المحتاجين و الضعفاء عن طريق وقوفه ضد الملك الإنجليزى اللى أرهق الفقراء بالضرائب فكان بيسرق من الأغنياء و يشترى بالفلوس أكل و يطعم الغير قادرين ..

مثال تانى شهير جداً هو مثال #زورو – #Zorro و دى شخصية خيالية تم إبتكارها سنة 1919 عن نبيل إسبانى عايش فى فترة إسبانيا الإستعمارية و كون قناعات إن السلطة ظالمة و إن الشعب عايش فى فقر و ظلم شديد فى الوقت اللى رجال الحكومة عايشين فى بذخ و من هنا بدأ ثورته الفردية لرد المظالم دى .. الظريف فى شخصية زورو إنه مكانش بيرد المظالم مادياً بس و لكن كان بيردها معنوياً كمان .. مبتكر الشخصية خلى زورو ينتقم من رجال الحكومة الفاسدين عن طريق إهانتهم علانية قدام الناس و بالتالى تقل هيبتهم و ميقدروش يسيطروا على الجموع ..

مثال تانى من اليابان .. بطل شعبى إسمه #إيشيكاوا_جويمون – #Ishikawa_Goemon .. الراجل ده كان بالأساس حرامى و كان ماهر فى الفنون القتالية و عاش فى القرن ال 16 فى اليابان فى الوقت اللى كان بيسيطر على البلاد أمراء الحرب و كل واحد منهم عنده عصابته اللى بتحميه و باقى الشعب مكوى بالضرايب و الظلم و القهر .. فى الوقت ده إتقتل أبو إيشيكاوا على إيد عصابة بتاعة واحد من أمراء الحرب دول و فى رواية تانية قالت إن أمه كمان إتقتلت فى نفس الواقعة .. الراجل بعدها قرر الإنتقام و بقى يسرق من العصابات دى و داعميهم من الأثرياء و التجار .. دهب و ممتلكات قيمة و غلال و حبوب و بقى ياخد اللى يكفيه و يوزع الباقى على الفقراء و تدريجياً عملياته توسعت لحد ما بقى يقتل أفراد العصابات دى و كمان ابتدى يقتل أمراء الحرب نفسهم لحد ما فى يوم إتقبض عليه و عقابه كان عسير بصراحة .. إتقتل قتلة دموية جداً .. إتحط هو و إبنه فى قدر كبير مليان مية و ولعوا النار تحته لحد ما مات مغلى حرفياً ..

ـــــ

القصص كتير عن الأبطال الشعبيين أنصار الغلابة و المدقعين و زى ما قلنا هتلاقيها فى كل مكان فى العالم تقريباً .. هتلاقيها بصيغ مختلفة و نوعية بطولة مختلفة .. أبو زيد الهلالى .. متولى الجرجاوى .. الزناتى خليفة .. راينر شوبرت الألمانى اللى هرب المواطنين التشيك من تشيكسلوفاكيا اللى كانت تحت سيطرة الإتحاد السوفييتى لألمانيا الغربية بعد الحرب العالمية الثانية .. الكاردينال خوان فريسنو و كبير الأساقفة راؤول هنريكيز اللى ساهموا بمجهودهم فى حماية آلاف التشيليين من بطش الديكتاتور أوجستو بينوشيه و وفرلهم الحماية القانونية و المساعدات المالية و كتير غيرهم من الأبطال اللى وقفوا قصاد الظلم ..

الملخص إن التاريخ بيكتب أسامى الناس دى بحروف من نور و القصص الشعبية اللى بتتألف على جرأتهم بتتكفل بنشر سيرتهم لدرجة إنهم بيكونوا سبب أحياناً فى إبتكار شخصيات خيالية تأسياً ببطولاتهم ..

تحية لكل واحد بيحاول يغير الواقع للأفضل فى حدود إمكانياته ..

ـــــ