عن العملات المشفرة و Pi Network وأشياء أخرى
ــــــــــــــــــــــــــــــــــــــــــــــــــــــــــــــــــــــــــــــــــ
بقالنا 3 أيام بيظهرلنا بوست طويل عريض بيتكلم عن تعدين عملة مشفرة جديدة إسمها Pi عن طريق أبلكيشن موبايل إسمه Pi Network وكما هو واضح فالبوست إنتشر بشكل مرعب بسبب إن أغلب اللى نشروه كان عندهم حلم الثراء السريع اللى البوست وعدهم بيه ..
مبدأياً للى ميعرفش الموضوع فالبوست بيتكلم إنك بتنزيل التطبيق فانت هتعمل عملية تعدين على العملة عن طريق موبايلك وهتفضل تجمع فى رصيد لحد ما العملة تنزل السوق وبعدها تبدلها بفلوس وتبقى غنى وكده .. سيبك من إن الفكرة ساذجة جداً وإن لو الدنيا سهلة بالشكل ده مكانش بقى فى حد فقير فى العالم كله ولكن خلينا ماشيين ورا الكلام ده للنهاية ..
ـــــ
بكل أسف كل اللى نزلوا التطبيق ده وإشتغلوا عليه من حوالى 6 شهور إتعرضوا لعملية خداع كبيرة من صناع التطبيق وتم إستغلال ضعف معلوماتهم عن مجال العملات المشفرة عشان يحملوا البرنامج وينشروا الفكرة بين الناس على إعتبار إنهم مش هيخسروا حاجة لو طلع الكلام ده كله كلام فاضى .. يعنى رابطين مكسبهم أو خسارتهم بالفلوس بس مش ببياناتهم اللى التطبيق جمعها ولا ساعات متابعتهم لوهم الثراء المنتظر ولا جمعهم لأرباح وهمية والأمل اللى عيشوا نفسهم وغيرهم فيه ..
التطبيق ده يا جماعة فى سياسة الإستخدام بتاعته بيجبرك على السماح لمبتكره بالإطلاع على كل بياناتك المسجلة على تليفونك .. جهات إتصالك .. صورك .. فيديوهاتك .. ملفاتك .. مع إمكانية تعديلهم وحذفهم .. وكيفية إتصالك بالإنترنت وتتبع مكانك بال GPS وغيرهم كتير .. هنا ممكن حد يقول إن جوجل وفيسبوك بياخدوا إجراءات مشابهة .. الإجابة إن حتى لو ده بيحصل فجوجل وفيسبوك بيقولوك صراحة أيوة إحنا بنعمل كده عشان نستغلك ونستخدمك كقاعدة تسويقية للشركات فإنت هتكسب كعميل وإحنا هنكسب كشركات ولكن Pi Network ده مفيهوش أى منفعة متبادلة .. ليه ؟
أى مبتدىء فى مجال العملات المشفرة عارف إنه عشان يكسب منه لازم يتوفر شروط كتير :
* لازم تبقى العملة مسجلة وبيتم تداولها فعلياً .. العملة دى Unlisted فى أى منصة تداول فى العالم .. يعنى لم تصدر أساساً .. عملة قيمتها صفر ولا يمكن تبديلها أو سحب أرباحها بأى شكل ..
* عشان تعدن أى عملة لازم تكون عملة مصدرة فعلياً عشان تخضع لتكنولوجيا ( البلوك تشاين – Block Chain ) والعملة دى لم تصدر زى ما قلنا وبالتالى ملهاش Blocks أصلاً .. يبقى بتتعدن إزاى ؟
*عشان تعدن عملة وتكسب منها لازم يكون عندك جهاز تعدين قوى ومصدر كهرباء قوى برضه وده لا يمكن يحصل عن طريق الموبايل لإن قدرته التعدينية ضعيفة جداً وبالتالى مش هيحقق أى مكاسب تذكر ( ده فى حالة إن العملة حقيقية أساساً )
* أى عملة إلكترونية محترمة بيبقى وراها مؤسسة أو شركة كبيرة بتقوم بتطويرها ودعمها وبناء سمعتها لحد ما العملة دى تلاقى القبول العام بين المتعاملين فى المجال وده غير متوفر فى العملة دى .. فلا هو معروف مين اللى وراها ولا إيه هى خطتهم لتطوير العملة ولا أى حاجة خالص ..
ـــــ
اللى حصل فعلياً يا جماعة فى الموضوع ده هو إن شوية نصابين حبوا يستفيدوا من ضعف ثقافة الناس بالمجال بإنهم يصنعوا تطبيق يجمعوا عن طريقه بيانات الناس وبكده هما استفادوا مرتين .. مرة عن طريق تحميل للتطبيق .. ومرة عن طريق تجميع أدق تفاصيل حياة الناس وبيعها مستقبلاً لأى جهة ممكن تستفيد من البيانات التسويقية العملاقة دى ..
طب إيه الفرق بين النصب ده وبين مجال العملات المشفرة ؟
الحقيقة الفرق كبير .. وتعالوا نشوف ..
ـــــ
عشان تدخل مجال العملات المشفرة فانت هيبقى قدامك 3 طرق :
1 – الطريق الأول هو إنك تشترى العملات عن طريق أى منصة من منصات التداول .. بتدخل على أى منصة تعجبك وبتسجل فيها وبترفع مستنداتك عشان تأكد هويتك .. أول ما ورقك بيتقبل بتقدر إنك تودع المبلغ المناسب ليك فى حسابك فى المنصة وبعدها بتقدر تشترى العملات اللى إنت شايف إن مستقبلها كويس ومتوقع إن سعرها هيزيد ..
النظام ده عيوبه أكتر من مزاياه لإنه بيعتمد على خبرة الشخص فى المجال وإنه لازم يكون متابع كويس لأخبار العملات وحجم التطور اللى بيحصل فيها وإيه الجهات اللى متوقع تتعامل بيها فى المستقبل وبالتالى ياخد قرار البيع أو الشراء وهو متطمن وده الحقيقة غير متوفر فى غالبية المتداولين ..
ـــــ
2 – الطريق التانى هو إنك تقوم بعملية تعدين على العملة .. والتعريف النظرى لعملية التعدين هى عبارة عن حل معادلات محاسبية بيقوم بيها أجهزة كمبيوتر .. طبعاً أنا متأكد إن أغلبكم مفهمش السطر ده عشان كده هديكم مثال عملى ..
لو بصينا لأى شركة من شركات تحويل الأموال فى أى دولة هتلاقى إن عندهم تطبيق حضرتك بتقوله لو سمحت حولى مبلغ كذا من حسابى لحساب الأستاذ فلان والعملية بتتم فى وقتها .. مين بقى اللى بيقوم بالعملية دى ؟ .. السيرفرات الخاصة بالشركة .. السيرفرات دى بتنجح فى ده لإن قدرتها بتستوعب حجم المعاملات اليومية لعملاء الشركة .. طب لو الشركة دى بتتعامل على مستوى قارة كاملة مش بلد معينة يبقى طبيعى إن سيرفراتها تبقى أقوى وأكبر .. طب لو الشركة دى بتتعامل على مستوى العالم .. الحل إيه وقتها ؟ .. هنا بقى مفيش شركة أو مؤسسة أو حتى دولة تقدر توفر سيرفرات تستوعب حجم المعاملات المهول ده .. وهى دى عبقرية فكرة البلوك تشاين
البلوك تشاين تكنولوجيا قائمة على عدم المركزية .. يعنى مفيش جهة أو دولة تقدر تتحكم فيها وتسيطر عليها .. تكنولوجيا بتستخدم أجهزة الكمبيوتر الخاصة بالأفراد حوالين العالم كله عشان يعملوا عملية تأكيد لتحويلات العملات المشفرة وده طبعاً بيتم بمقابل مش مجاناً يعنى .. المقابل ده هو ربح عملية التعدين .. كل ما جهاز الكمبيوتر بتاعك كان قوى يقدر يحل معادلات أكتر وبالتالى يأكد عمليات تحويل أكتر وبالتالى يكسب أكتر .. نفس فكرة شركة أوبر بالمناسبة ..
ـــــ
3 – الطريق الثالث هو تعدين برضه ولكن بشكل مختلف شوية .. إحنا قلنا فى النقطة الثانية إنك عشان تعدن لازم يبقى عندك جهاز كمبيوتر قوى .. سعره عادة بيتراوح بين 60 ألف : 80 ألف جنيه .. بخلاف طبعاً إن الجهاز ده بيستهلك كهرباء شهرياً بكمية كبيرة مش هتقل عن 2000 جنيه وده غالباً مش متوفر لأغلب الناس ..
الوضع ده أنتج نوع مختلف من التعدين إسمه ( التعدين السحابى – Cloud Mining ) وده بيتم عن طريق شركات بيبقى عندها أجهزة تعدين عملاقة بتأجرها للمستثمرين اللى عاوزين يدخلوا المجال بمبالغ تعتبر بسيطة عن طريق شراءهم لباقات تعدين لفترات بتوصل ل 3 سنين بالإضافة لتحميله تكلفة الكهرباء .. المستثمر بيستفيد من عائد التعدين لفترة طويلة والشركة بتكسب من ثمن الإيجار وعمولات التحويل بالإضافة لإن الأجهزة فى النهاية بتفضل ملكها ..
ـــــ
دى كانت نظرة سريعة عن سوق العملات المشفرة وإزاى تدخله وأنا قصدت إنى مكتبش أى تفاصيل زى أسماء منصات تداول أو شركات تعدين أو حتى أسماء عملات عشان محدش يظن إنى بعمل دعاية للمجال بشكل عام أو للشركات بشكل خاص .. الشيء بالشيء يذكر فلازم التنويه إن مجال العملات المشفرة زى ما بيحقق أرباح كبيرة له بعض العيوب اللى بتوصل أحياناً لخسارة رأس مالك بالكامل وده عشان محدش يفتكر إن المجال ده مغارة على بابا واللى هيدخله هيغتنى فى يوم وليلة ..
ـــــ
أخيراً لو حضراتكم خدتوا بالكم فعنوان المقال كان ( عن العملات المشفرة و Pi Network وأشياء أخرى ) وزى ما شفتوا فأنا إتكلمت عن ال Pi والعملات المشفرة بس ومتكلمتش عن الأشياء الأخرى ..
الحقيقة هو مفيش أشياء أخرى ولا حاجة .. أنا بس حسيت إن الكلمة هتبقى لطيفة لو أضفتها للعنوان ..
تحياتى 🙂
ـــــ
