أنا مشفق جداً على الأجيال اللى جاية .. فيه عمل دؤوب بيقوم بيه الفيمنستات وجمعياتهم لتنفير الأجيال دى من فكرة الجواز .. توعية وتوضيح للمتزوجات أو المقبلات على الزواج بأدق بنود القوانين اللى عن طريقها تقدر تخرب بيت جوزها الحالى أو المستقبلى .. تقوية للمتزوجات على أزواجهن بشكل فج ودعوتهن لتحديهم والتعامل معاهم بندية كاملة مع عدم إعترافهن بأى خطأ تحت أى ضغط ..
من فترة قصيرة شفت فيديو فيه واحدة بتكلم مجموعة من السيدات بتشرحلهم فيه إزاى يستولوا على العفش وبعدين يعملوا بلاغ فى القسم ضد أزواجهن عشان يثبتوا عليهم تهمة تبديد القايمة ويحبسوهم .. فى نفس الفترة شفت بوست متاخد سكرين شوت من أحد جروبات السيدات لواحدة بتسأل أعضاء الجروب عن حقيقة إتخاذ موضوع الجواز كمهنة الست تتكسب منها .. يعنى الست تتجوز واحد وبعد فترة تخلف طفل وبعدين تطلق منه بحكم محكمة فتستولى على الشقة بحكم إنها حاضنة وتستفيد بالنفقة مع تكرار الموضوع ده على قد ما تقدر بس بدون خلفة بقى .. المفاجأة إن ردود السيدات فى الجروب كلها تقريباً أجمعت على وجود المهنة دى وإنتشارها من سنين ..
ـــــ
أخر النوادر بقى هو طلبات المجلس القومى للمرأة واللى هتلاقوا صورتها مرفقة مع المقال .. طلبات ما أنزل الله بها من سلطان وغير مستمدة من شرع أو دين .. طلبات كل هدفها تقوية وتغليب جانب المرأة على الرجل حتى ولو بالباطل .. خد عندك مثلاً :
1 – عاوزين الست تتجوز بدون ولى رغم إن ده معلوم بالضرورة من الدين ومتواتر من فجر الإسلام ..
2 – عاوزين الراجل ميعددش إلا بموافقة الزوجة والقاضى .. يعنى الست تتجوز بدون ولى والراجل يبقى ليه وليان .. الزوجة والقاضى .. لا حول ولا قوة إلا بالله ..
3 – إلغاء حكم الطاعة .. يعنى الست تخرج من بيته وتهجره وتعصيه وتعيش بعيد عن بيت الزوجية وتبقى ناشز شرعاً وهو ميبقاش ليه الحق فى إرجاعها لبيته تانى .. يا سلام ..
4 – النص على حق الكد والسعاية وده لا خلاف عليه ولكن فى حالة إن الزوجة تكون شاركت زوجها بمالها أو حتى ساهمت فى تنمية ماله ببذل الجهد والعمل معه .. لكن هل هما عاوزين كده ولا عاوزين يطبقوه بتخصيص جزء من مال الزوج لصالح زوجته المطلقة على حياة عينه بدون أى مساهمة منها ؟
5 – عاوزين يلغوا الطلاق الشفوى رغم إن ده معلوم بالضرورة من الدين ومتواتر من أيام النبى ﷺ وفوق ده فيه حديث صحيح حيث قال ﷺ :
( ثلاث جَدّهن جد وهَزلهن جد .. النكاح والطلاق والرجعة )
يعنى لو راجل ناقص طلق مراته شفوياً ولو 50 مرة تضطر المسكينة تعيش معاه ( فى الحرام ) غصب عنها لمجرد إن سيادته مش راضى يروح يطلق رسمى قدام مأذون .. ما شاء الله على أفكاركم ..
6 – عاوزين الخلع يبقى طلاق بائن مش فسخ للزواج .. وده بالفعل مطبق فى القانون المصرى وأقرت بيه دار الإفتاء المصرية .. يعنى بيطالبوا بالمطبق فعلياً .. يعنى الست بتخلع جوزها وبتاخد منه كل حقوقها كمطلقة وفوق ده لو الراجل إتجنن وحب يردها يبقى بعقد ومهر جداد .. إيه المطلوب تانى أكتر من كده ؟
7 – عاوزين يساووا بين شهادة الرجل والمرأة فى تحدى صارخ للقرءان .. ربنا بيقول فى سورة البقرة الآية 282 :
( فَإِن لَّمْ يَكُونَا رَجُلَيْنِ فَرَجُلٌ وَامْرَأَتَانِ مِمَّن تَرْضَوْنَ مِنَ الشُّهَدَاءِ أَن تَضِلَّ إِحْدَاهُمَا فَتُذَكِّرَ إِحْدَاهُمَا الْأُخْرَىٰ ۚ )
8 – عاوزين دخل المرأة من عملها ميكونش سبب فى إسقاط نفقتها .. ودى النقطة الوحيدة اللى شايف إن النقاش فيها طبيعى ومنطقى ..
9 – عاوزين زيادة سنوية فى النفقة وبنسبة مئوية .. يعنى عاوزين يخربوا بيت الزوج حرفياً .. عاوزين زيادة بغض النظر عن وضع الزوج المادى ووضع الإقتصاد .. المهم ياخدوا زيادة .. الراجل يجيبها منين بقى مش مشكلتهم .. يسرق أو يقتل مش موضوعهم ..
10 – عاوزين يكشفوا عن حسابات الزوج البنكية .. ورغم إن ده مش من حقهم ولكن هو طلب مش منطقى أساساً .. كده كده الكشف ده لو تم إقراره فالزوج هيسحب فلوسه أو هينقلها كلها لأى حساب تانى ولو حتى بره مصر .. يعنى الفكرة نفسها تطبيقها صعب جداً ..
11 – عاوزين يثبتوا موافقة الزوجة على إستضافة طليقها لأولاده .. يعنى الراجل عشان يشوف ولاده لازم يبقى بموافقة رسمية وكتابية من الزوجة .. ورغم إن ده فى الواقع لا يمكن يتم إلا بموافقة الزوجة إلا إنهم عاوزين يخلوا الموافقة مكتوبة ورسمية إمعاناً فى إذلال الزوج وإخضاعه .. فكرة إنتقامية بالأساس .. ده الرجالة بيطلع عينها حرفياً عشان تشوف وتلمس عيالها فى مجالس الرؤية اللى مفترض إنها ( قانونية ) وفيديوهات المعاناة مغرقة الإنترنت لو عاوزين تتأكدوا بنفسكم .. فما بالكم بالإستضافة بقى ..
ـــــ
إحنا قدام مشكلة كبيرة يا جماعة .. مشكلة بتكبر كل يوم وإحنا عاملين نفسنا مش شايفنها وجمعيات النسويات قالبة الموضوع معركة لازم يطلعوا فيها منتصرين ولو على حساب المجتمع ككل .. طريقة مخاطبة النسويات لعامة الناس من السيدات فيها تحفيز شديد ضد الرجل عموماً وضد الزوج خصوصاً ..
عاوزين تعرفوا المشكلة وصلت لإيه ؟
مصر يا اخوانا حققت 255 ألف حالة طلاق فى 2021 وده أكبر عدد حالات طلاق فى تاريخ مصر من يوم ما خلقها ربنا .. حالات الزواج فى نفس العام كانت 948 ألف حالة .. يعنى نسبة الطلاق وصلت ل 26.9 % .. بين كل 5 حالات زواج بيحصل طلاق فى واحدة منهم .. متخيلين حجم الخطر ؟
إحنا قدام سباق محموم للتفكك الأسرى بيحركه العناد .. غياب شبه كامل لدور الدين فى توعية الزوج والزوجة لطبيعة حياتهم المستقبلية وحجم التحديات اللى هيواجهوها فاضطر الشباب والبنات يملوا الفراغ النفسى اللى عندهم بحاجات بديلة .. الشاب حركته خلفيته الذكورية وإن كلامه طبيعى يطاع فى بيته والشابة مشيت ورا إدعاءات المظلومية وإن المرآة حقوقها منقوصة ولازم تحارب عشان تستردها تانى حتى لو كانت عن طريق مطالب مخالفة للشرع والدين .. وشرع إيه بقى ما هو دوره تقلص زى ما احنا لسه متفقين ..
ــــــ
الدايرة للأسف بقت مقفولة ..
الشاب لما يلاقى كم الصعوبات دى قصاده هيتردد فى قرار الجواز ألف مرة وهيوجه نظره للزواج من أجنبية .. واللى متجوز وللأسف ملاقاش سعادته فى الجواز هيضطر يتوجه للجواز العرفى لإنهم عاوزين يحرموا التعدد اللى شرعه ربنا .. واللى نوى إنه يتجوز للمرة الأولى هيواجه خطر الطلاق اللى وصل لأكتر من ربع حالات الزواج زى ما قلنا ..
حجم الطلاق المتزايد ده هيفرز بالتبعية عدد كبير جداً من الناس اللى ظروفهم أسوأ بكتير .. الزوج هيتأثر مادياً فهيبقى عاوز يشتغل أكتر عشان يزود دخله .. الزوجة هتبقى هى كمان عاوزة تشتغل عشان تزود دخلها ومتبقاش تحت رحمة النفقة اللى بيدفعها طليقها .. عدد العمالة فى السوق يزيد سنة ورا سنة .. فى وضع زى ده طبيعى جداً إن المرتبات تقل بسبب زيادة المعروض وقلة الطلب .. قلة فرص العمل وقلة المرتبات هتخلق ضغوط أكبر حتى على المتزوجين فتضطر الزوجة إنها تنزل تشتغل عشان تساعد الزوج فيزيد المعروض أكتر فى سوق العمل .. فتزيد الضغوط .. فيزيد معدل العزوف عن الزواج بين الشباب وتزيد معدلات الطلاق بين المتزوجين .. وهكذا ..
ـــــ
هل هناك رجل رشيد يجرؤ يقول إن كل ده بيحصل بسبب بعدنا عن شرع ربنا ؟
بعدنا عن المنهج اللى ربنا سبحانه وتعالى رسمهولنا لإنه أعلم بما فى نفوسنا من أهواء وإن طبيعى كل طرف يستميت فى الدفاع عن اللى شايفه حق ليه .. منهج حدد فيه ربنا سبحانه وتعالى الحقوق وفرض فيه الواجبات .. إنت كراجل عليك واجبات وليك حقوق وانتى كست عليكى واجبات وليكى حقوق .. معادلة بسيطة وسهلة وأطرافها اتعلموها وقالوا سمعنا وأطعنا فعاشوا مرتاحين .. الدنيا كانت ماشية زى الساعة لحد ما ابتلينا بثقافة الغرب فاستبدلنا الحقوق والواجبات اللى فرضها ربنا بحقوق وواجبات ألفها بشر نشأوا فى مجتمعات مخالفة لعقيدتنا وثقافتنا وقررنا نطبقها عشان ماشية على هوانا أكتر من كلام ربنا ..
الله المستعان علينا أقسم بالله ..
ـــــ
