قصص قصيرة من التاريخ
ـــــــــــــــــــــــــــــــــــــ
#فرديناند_ماركوس حكم الفلبين 20 سنة عمل فيهم كل الجرايم اللى ممكن يعملها حاكم فى شعبه .. ضاعف الديون .. قفل كل الصحف المعارضة و سيطر على الإعلام .. سجن و عذب و أعدم المعارضين السياسيين .. قتل ( بنينو أكينو ) أكبر معارضيه على سلم الطيارة لمجرد إنه قرر يرجع الفلبين لدعم الأحزاب المعارضة فى الإنتخابات .. يعنى الراجل مكانش مترشح ده يدوبك قرر إنه يشارك فى الإنتخابات .. و فوق كل اللى فات زور الإنتخابات و عطل الدستور .. 20 سنة كاملين من التضييق و الممارسات الدموية ..
النتيجة :
ثورة شعبية مهولة عام 1985 أجبرته على التنحى عن الحكم و هروبه للولايات المتحدة الأمريكية و عاش هناك 3 سنين لحد ما مات ..
ـــــ
#أحمد_سوكارنو كان رئيس إندونسيا سنة 1965 .. فى الوقت ده كانت الحرب بين الشيوعية و الرأسمالية على أشدها و كل الوسائل مشروعة فى الحرب دى .. خلال الفترة دى حصلت محاولة إنقلاب على سوكارنو إلا إن الجنرال #محمد_سوهارتو قدر إنه يجهضها و الأراء هنا متضاربة و مش معروف الحقيقة فين .. سوكارنو اليمينى قال إن الشيوعيين هما اللى قاموا بالإنقلاب و الشيوعيين بيقولوا إن سوكارنو هو اللى إخترع الإنقلاب ده عشان يقدر ينتقم منهم .. المهم سوكارنو و سوهارتو أسرفوا فى الإنتقام من الشيوعيين .. 100 ألف معتقل دون أى تحقيق و عشرات آلاف القتلى وصلت فى أسوأ التقديرات لنص مليون قتيل .. بعد سنتين حالة سوكارنو الصحية هتسوء و هيسيب الحكم للجنرال محمد سوهارتو ..
سوهارتو حكم إندونسيا 31 سنة حكم شمولى زى ما الكتاب بيقول .. تضييق سياسى و سجن و تعذيب و قتل و غياب عدالة إجتماعية .. سوء الإدارة الإقتصادية لسوهارتو خلى البلد تفتقر و معاها ملقاش مفر من زيادة القروض و اللى كانت أساساً عالية جداً و الحل طبعاً كان عند صندوق النقد الدولى .. 43 مليار دولار رفعت الديون ل 138 مليار دولار .. شروط الصندوق معروفة طبعاً .. تعويم العملة و إلغاء الدعم و تخفيض الأجور .. العملة خسرت 84 % من قيمتها خلال 5 شهور .. البنزين سعره زاد بنسبة 71 % و التضخم وصل ل 60 % ..
النتيجة :
ثورة شعبية عام 1998 مات فيها 1200 شخص أجبرته على التخلى عن الحكم و الهروب لضواحى جاكرتا و الإبتعاد من الأضواء لحد ما قررت المحكمة العليا هناك محاكمته بعد ما التحقيقات أثبتت ضلوعه فى إختلاسات مالية و فضلت محاكمته سارية لحد ما اتوفى ..
ـــــ
#ألبرتو_فوجيمورى حكم بيرو 10 سنين بعد ما خدمته ظروف الإنتخابات .. الشعب إختاره كإجراء عقابى للسلطة اليمينية اللى كانت بتحكم البلد قبله فاختاروه بعد ما صرح كام تصريح يسارى من اللى بيعجبوا الجماهير إلا إنه بمجرد وصوله لكرسى الرئاسة نسى كل وعوده اليسارية و طبق برنامج تقشفى من العيار الثقيل .. شال الدعم و خفض العملة فالأسعار زادت .. فتح الباب قدام المستثمرين الأجانب و عفاهم من الضرايب فأثر على المنتج المحلى و انهارت الصناعة و إزداد رواج المنتجات المستوردة .. الكهرباء و المياه و الغاز و المحروقات أسعارهم تضاعفت من أول 5 أضعاف وصولاً ل 30 ضعف .. الإقتصاد فى الوقت ده تعافى بالمناسبة و لكن بحكم إن المسار كان رأسمالى صرف دون أى إعتبارات إجتماعية فالنمو تم ترجمته لأرباح فى جيوب الرأسماليين الموالين للمعلم فوجيمورى أما الشعب فمشافش أى حاجة من النمو ده ..
فى فترته الرئاسية الثانية قرر يسيطر على كل شيء .. غير مجالس إدارات الصحف و عين رؤساء الجامعات و شكل هيئة تنظيم الإنتخابات على مزاجه و سجن المعارضين طبعاً و فوق ده كله أشرف على برنامج طبى سرى هدفه تعقيم 300 ألف سيدة للحد من الزيادة السكانية .. بعد كل ده حاول يقعد فى السلطة أكتر فحاول يعدل الدستور عشان يسمحله يترشح لعدد مفتوح من المرات فالشعب رفض الإستفتاء .. الراجل مسلمش للأمر الواقع و قرر إنه يلجأ للكونجرس البيروفى فاخترعوله قانون تفصيل كده يسمحله بالترشح لمرة كمان و بالفعل إتعملت الإنتخابات لكنه جاب نتيجة 49.9 % و بكده لازم يبقى فى جولة إعادة لإنه معداش نسبة ال 50 % .. حاول تزوير النتيجة لكن معرفش فاضطر إنه ينزل جولة إعادة ضد منافسه أليخاندرو توليدو و بالفعلكسب بنسبة 51 % بعد ما المعارضة رفضت تشترك فى الإعادة .. المجتمع الدولى رفض النتيجة و اعتبرها مزورة و مع رفضها بدأت تظهر فضايح رشاوى من نظام فوجيمورى لتسهيل فوزه بالمنصب ..
النتيجة :
ثورة شعبية أجبرت فوجيمورى على إلغاء نتيجة الإنتخابات و إعادتها بعد 3 شهور من غير ما يشارك فيها .. بعد 3 أيام هرب فوجيمورى على اليابان و بدأت السلطات فى تجميع الأدلة ضده و قدمتها لحكومة اليابان اللى وافقت إنها ترجعه للمحاكمة فى بيرو .. إتحاكم الديكتاتور و أدين بجرائم ضد الإنسانية و فساد مالى و تربح و وصلت جملة الأحكام اللى عليه ل 38.5 سنة ..
ـــــ
#لويس_جارسيا_ميزا حكم بوليفيا 13 شهر بس بين عامى 80 و 81 بعد ما انقلب على الرئيسة #ليديا_جيلار المنتخبة ديموقراطياً .. الحقيقة الراجل ده مضيعش وقت أبداً .. 13 شهر عمل فيهم اللى معملوش غيره فى سنين .. قتل أكتر من 1000 معارض سياسى و سجن و نفى آلاف غيرهم .. خنق المجال السياسى و الشعبى فى البلد تماماً حتى إنه شجع حكومته على الإتجار فى المخدرات بشكل رسمى ..
النتيجة :
إنتفاضة شعبية كبيرة أجبرته على الهروب للبرازيل و إتحاكم غيابياً و اتحكم عليه ب 30 سنة سجن فقامت حكومة البرازيل مرجعاه لبوليفيا لتنفيذ الحكم و مات فى السجن عام 2018
ـــــ
#نيكولاى_تشاوشيسكو حكم رومانيا لمدة 24 سنة إرتكب فيهم جرايم صعب حصرها .. بخلاف التضييق السياسى الطبيعى و الإعتقال و التصفية الجسدية للمعارضين فالراجل بصماته الإقتصادية كانت أسوأ بمراحل .. فشل إقتصادى مرعب أدى لنقص سيولة و بالتالى عدم توفر السلع فالحل طبعاً كان فى الإقتراض .. وصلت الديون فى عهده ل 10 مليار دولار و ده رقم كان مهول مقارنة بإمكانيات البلد وقتها .. وسط القروض دى و بأخطاء سياسية ساذجة خسر تشاوشيسكو حلفاءه سواء فى الشرق أو فى الغرب و بالتالى حنفية القروض إتقفلت و جه وقت السداد .. ملقاش قدامه غير الترويج لفكرة المؤامرة و إننا مستهدفين و لازم نستحمل عشان نسدد ديوننا و نرفع راسنا فى وش الإستهداف الخارجى الحقير ده .. هنصدر إنتاجنا الزراعى كله يا رومانيين و لازم تستحملوا .. كل ده حصل و جهاز الشرطة السرية ( السيكيوريتات ) بيتابع الشارع و أى معارض يفكر يعترض تتعامل معاه بطريقتها ..
مع تطبيق التقشف الناس جاعت حرفياَ .. مبقاش فى أكل فى المحلات و لو إتوجد فأسعاره زادت أضعاف .. العيش اتصرف بنظام الحصص و حصة كل فرد نص رغيف فى اليوم .. الكهرباء بتقطع أغلب ساعات اليوم .. مفيش غاز للتدفئة .. التلفزيون دمج كل قنواته فى قناة واحدة و بتشتغل لمدة ساعتين بس فى اليوم .. متوسط عدد الوفيات سنوياً فى الفترة دى كان 15000 قتيل .. وسط كل ده قرر تشاوشيسكو إنه يبنى قصر الشعب بتكلفة إجمالية 2 مليار جنيه إسترلينى .. ثانى أكبر مبنى إدارى بعد البنتاجون .. قصر إتبنى على 45 ألف متر و شارك فى بناءه 15 ألف عامل .. قصر فيه 1000 غرفة و إرتفاعه 100 متر و إتشال عشان خاطره خُمس العاصمة بوخارست .. 2 مليار إسترلينى و الشعب فعلياً كان بياكل نص رغيف يومياً و بيموتوا من البرد و سوء التغذية ..
النتيجة :
ثورة شعبية كبيرة فى ديسمبر 1989 إنتهت بالقبض عليه هو و مراته و إعدامهم بعد محاكمة صورية استمرت ساعتين بس ..
ـــــ
#إيريش_هونيكر حكم ألمانيا الشرقية 18 سنة حول فيهم الدولة لسجن كبير بحكم الصبغة الشيوعية للحكم فى ألمانيا الشرقية وقتها .. زرع جواسيس فى كل مكان .. مفيش ديموقراطية و مفيش رأسمالية و أى حد هيطالب بده فالمعتقل هيبقى مكانه الطبيعى .. الإنغلاق الشديد ده خلى الوضع الإقتصادى سيء جداً و بالتالى بدأت موجات الهجرة ناحية الجارة ألمانيا الغربية اللى عندها حرية و ديموقراطية و مناخ إجتماعى أفضل .. و بدل ما يعيد الديكتاتور تفكيره و يشوف حالة شعبه وصلت لفين أمر بزيادة الحراسة على سور برلين و اللى يفكر إنه ينط من على السور و يهرب للطرف الغربى يضربوه بالنار .. وسط كل ده أمر آلته الإعلامية الجبارة إنها تشتغل بأقصى طاقتها لإقناع الشعب بحجم الرفاهية المتوفرة لهم مقارنة بالشعب الألمانى الغربى ..
النتيجة :
إنتفاضة شعبية أجبرت هونيكر على الهرب و اللجوء للسفارة التشيلية فى موسكو و لكن بعد الإتحاد مع ألمانيا الغربية و هدم سور برلين تم إعادته مرة تانية عشان يواجه الجرايم اللى إرتكبها فى حق الشعب و لكن بسبب كبر سنه و مرضه تم العفو عنه و ترحيله لتشيلى مع أسرته و مات هناك بعد أقل من سنتين ..
ـــــ
#خورخى_فيديلا حكم الأرجنتين 5 سنين و ده بقى حكاية .. ديكتاتور لا يشق له غبار .. سفاح حقيقى يعنى مش أى كلام .. وصل للسلطة بإنقلاب عسكرى على #إيزابيل_بيرون المنتخبة ديموقراطياً .. حبس و سجن و تعذيب و قتل خارج القانون فى معسكرات سرية .. خطف لأطفال المعارضين السياسيين .. دمويته وصلت لشحن أكتر من 30 ألف من معارضيه فى طائرات و رميهم وسط المحيط و بكده يا هيموتوا من التعب يا هتاكلهم أسماك القرش المنتشرة فى كل مكان ..
على المستوى الإقتصادى فالراجل إقترض فى 5 سنين 3 أضعاف اللى إقترضته الأرجنتين على مدار تاريخها و انهارت على إيده قيمة العملة المحلية و ارتفعت نسبة الفقر و اختفت الطبقة المتوسطة و انتشرت العمليات الإجرامية فى كل مكان بسبب الفقر ..
النتيجة :
إنتفاضة شعبية أجبرت جنرالات الجيش على التخلى عنه و القبض عليه خاصة بعد خسارة حرب فوكلاند ضد المملكة البريطانية .. إتحاكم بعد كده على جرايمه و إتحكم عليه بالسجن مدى الحياة لحد ما لقوه ميت فى حمام زنزانته سنة 2013
ـــــ
#أوجستو_بينوشيه حكم تشيلى لمدة 17 سنة بعد إنقلاب على الرئيس #سلفادور_آييندى .. 17 سنة من الرعب المقيم .. بينوشيه كان واحد من أقسى الطغاة فى التعامل مع معارضيه .. خلال أول 3 شهور بعد الإنقلاب إعتقل 13 ألف شخص و نفى أكثر من 20 ألف تانيين .. بعدها نصب نفسه رئيس للدولة و رقى نفسه لرتبة إستحدثها مخصوص لنفسه إسمها كابتن جنرال و بعدها بدأ عهد رعب جديد .. 100 الف معتقل مات منهم 3200 من شدة التعذيب .. إجمالاً حصلت فى عهده 28000 حالة تعذيب و ده اللى تم إثباته بس .. من كثرة عدد المعتقلين و عدم توفر أماكن ليهم كان بيتم إعتقالهم فى المبانى المهجورة و لما العدد زاد أوى و بقى فى صعوبة فى توفير أكل و شرب ليهم أمر بترحيل عدد تم تقديره بين 5000 و 10000 معتقل للإستاد الوطنى فى العاصمة و هناك تم إعدامهم بشكل جماعى ..
على المستوى السياسى الموضوع مختلفش كتير .. عدل الدستور و ألغى تعددية الإنتخابات و استبدلها بالإستفتاء على مرشح واحد .. حصن نفسه فى الدستور فى حالة خسارته بإنه يرجع لموقعه كوزير للدفاع و يكون له كرسى دائم فى الكونجرس و لا يحاكم تحت أى ظرف من الظروف ..
على المستوى الإقتصادى فالإنهيار كان مرعب .. باع الشركات اللى كانت ناجحة و بتكسب و رجع الشركات اللى أممها آييندى قبل كده لملاكها الأجانب و استدان و قلل سعر العملة و ارتفعت البطالة من 4.3 % ل 22 % و زاد التضخم لحد ما بقى 370 % و ألغى الحد الأدنى للأجور و خفضه و ألغى حقوق العمال و عطل النقابات العمالية .. كل ده أسهم إن الإقتصاد يبقى بنسبة سالبة تاريخية هى ( – 10.8 % )
النتيجة :
إنتفاضات عمالية تبعتها حركة شعبية كبيرة فى الشوارع و حملات رافضة للدستور إضطرته لقبول رقابة قوية على الإستفتاء و بالفعل رفض الشعب وجوده فرجع لمنصبه تانى لحد ما اتقبض عليه فى لندن سنة 1998 على خلفية إتهامه بجرائم ضد الإنسانية .. قعد سنة قيد الإقامة الجبرية و بعدين إترحل لتشيلى عشان يستكملوا محاكمته بعد ما أسقطوا عنه منصبه البرلمانى و فضل يتحاكم لحد ما مات فى ديسمبر 2006
ــــ
لقراءة الموضوع على التطبيق الخاص بالكاتب على جوجل بلاى :
https://play.google.com/store/apps/details?id=com.amkamel.arabyhost
لقراءة الموضوع على التطبيق الخاص بالكاتب على آب ستور :
https://itunes.apple.com/app/id1432249734
ـــــــــــــــــــــــــــــــــــــــــــــــــ