الملاذات الضريبية .. البوابة الذهبية لصنع الثروات
ــــــــــــــــــــــــــــــــــــــــــــــــــــــــــــــــــــــــــــ
الجزء الثانى :
ـــــــــــــــــــــ
* إيه هو حجم الخسائر اللى دول العالم بتتحملها بسبب الملاذات الضريبية ؟
– التقارير الرسمية اللى بتصدر حول العالم أرقامها مختلفة و ده طبعاً مفهوم لإن زى ما قلنا المعاملات دى بتبقى سرية ومفيش ورق عليها و لكن طبقاً للحالات اللى تم إكتشافها فالمؤسسات الرقابية العالمية قدرت تحط تصور لحجم الخسائر دى ..
– الدول النامية على سبيل المثال تم تقدير خسايرها الضريبية ب 100 مليار دولار سنوياً .. دول العالم إجمالاً بتخسر أكثر من نصف تريليون دولار سنوياً .. إحنا هنا بنتكلم عن ضرايب بس يا جماعة مش أصول المبالغ .. أصول المبالغ تم تقديرها بحوالى 15 % من حجم رؤوس الأموال المتوفرة فى الدول .. وإجمالاً قدرت الأموال المودعة فى دول الملاذات الآمنة بحوالى 20 إلى 30 تريليون دولار ..
– المؤسسات اللى قدرت المبالغ دى هى #البنك_الدولى و #منظمة_التعاون_الاقتصادي_و_التنمية OECD و #شبكة_العدالة_الضريبية وغيرهم كتير من المؤسسات غير الحكومية فى العالم الأول و ده بخلاف كيان زى #الإتحاد_الأوروبى ..
ـــــ
* طبعاً المؤسسات دى بتحاول تفرض نوع من الرقابة والضغوط على الملاذات الضريبية زى ما عملت #OCED اللى طرحت مبادرة لتحسين مستوى تبادل المعلومات بين الدول فيما يخص الضرائب ويبقى كل الدول المنضمة للمبادرة عندها علم بالاموال الخارجة والداخلة إليها .. بحلول عام 2004 كان تم إنضمام 33 دولة للمبادرة ورفضت 5 دول هما أندورا و ليبيريا و ليشتنشتاين و جزر مارشال و موناكو لكن للأمانة فالدول اللى انضمت ملتزمتش أوى ببنود المبادرة ومستوى التعاون مزادش أوى ..
– الإتحاد الأوروبى هو كمان عمل قائمة بالدول الغير متعاونة و أدرج فيها 17 دولة كان بينهم 3 دول عربية هى تونس والإمارات والبحرين لكن بعد فترة شطبوا منها 8 دول منهم الإمارات وتونس .. طبعاً الشطب ده أثار حفيظة المتابعين واتهموا الإتحاد بعدم الشفافية و ده ضرب مصداقية القائمة فى مقتل خاصة إذا عرفنا إن القائمة اللى تم شطب ال 8 دول منها كانت بالأساس بتضم 29 دولة تدريجياً بقوا 17 وأخيراً بقوا 9 .. يعنى حاجة كده عالكيف وداخل فيها إعتبارات سياسية كتير ..
ـــــ
* عدم شفافية المؤسسات اللى فوق دى خلى النظر يتوجه لأكثر مؤسسة بتعتمد على الأسلوب العلمى فى الرقابة وبعيدة تماماً عن المواءمات السياسية .. #تاكس_جاستس_نتوورك أو شبكة العدالة الضريبية .. و دى مؤسسة مستقلة غير ربحية تم إطلاقها من البرلمان البريطانى عام 2003 و هى مهتمة بأبحاث المجال الضريبى وبتصدر كل سنتين تقرير مفصل بالأرقام والممارسات اللى بتستخدمها الدول للإستفادة من فكرة الملاذات الضريبية .. مش محتاج أقولكم إن القائمة بتاعتها مختلفة تماماً عن القوائم اللى بتعدها المؤسسات السابق ذكرها ..
1 – سويسرا
2 – الولايات المتحدة الأمريكية
3 – جزر كايمن
4 – هونج كونج
5 – سنغافورة
6 – لوكسمبورج
7 – ألمانيا
8 – تايوان
9 – الإمارات
10 – جزيرة جيرنسى ( إحدى الجزر البريطانية )
الترتيب أطول من كده طبعاً و هتلاقوا الرابط بتاعه فى المصادر ..
ـــــ
* بحكم الثقل السياسى هنركز طبعاً على الولايات المتحدة بحكم إنه أبرز إسم دخل على القائمة خاصة إنه ثانى إسم فيها ..
– أمريكا دولة رأسمالية و بلا شك السوق عندها حر بشكل كبير وطبعاً إتأثرت بشكل أو بأخر من موضوع الملاذات الضريبية ده .. يكفى إنى أقولك إن 83 شركة من قائمة أكبر 100 شركة أمريكية لها فروع فى ملاذات ضريبية .. ده رقم كبير جداً بيهدر فلوس كتير أوى على أمريكا .. من أبرز الشركات دى شركة أبل واللى تم اكتشاف أمرها بعد إنتشار أوراق بارادايس اللى إتكلمنا عنها فى الجزء الأول .. آبل ليها دلوقت 252 مليار دولار فى جزيرة جيرسى فى أيرلندا .. قدرت عن طريق ثغرة فى القانون الأيرلندى إنها تخفض نسبة الضرائب من 12.5 % فى أيرلندا أو 35 % فى الولايات المتحدة إلى 0.005 % بس .. بالطريقة دى آبل قدرت إنها تتهرب من دفع 88 مليار دولار .. لطيف جداً الحقيقة ..
– خسائر أمريكا سنوياً من تهرب شركاتها ضريبياً وصل لحوالى 200 مليار دولار كل سنة .. آبل مش الشركة الوحيدة .. جوجل .. مايكروسوفت .. IBM .. جنرال إليكتريك .. سيتى جروب .. جولدمان ساكس .. إكسون موبيل .. جونسون آند جونسون .. وغيرهم كتير .. طبعاً ده خلى #دونالد_ترامب يوعد الشركات دى بتخفيض كبير جداً فى الضرائب فى مقابل إرجاع أموالهم للولايات المتحدة الأمريكية وبالتالى تدخل فى العملية الإنتاجية الأمريكية ..
– الموضوع فى أمريكا قديم و التهرب ده كان بيضايقهم جداً و ده خلى الرئيس الأمريكى الأسبق #باراك_أوباما يقول نصاً فى أحد خطاباته عام 2009 :
( تحدثت عن غضبنا من مبنى فى جزر كايمان يحتوى على أكثر من 12000 شركة يدعون جميعاً أن #مبنى_أوجلاند_هاوس هو مقرهم الرئيسى .. و لقد قلت من قبل .. إما أن هذا هو أكبر مبنى فى العالم أو أن تلك هى أكبر عملية تهرب ضريبى فى العالم )
فى يومنا الحالى مبنى أوجلاند هاوس يعتبر مقر رئيسى لأكثر من 19000 شركة حول العالم .. أمريكا وقتها كانت بتشتكى إنها متضررة من خروج رؤوس الأموال منها .. طب إيه الأخبار دلوقت ؟
ـــــ
* نرجع تانى لشبكة العدالة الضريبية .. الشبكة دى قبل إصدار تقاريرها درست 112 قانون ضريبى حول العالم وبستخدم عادة معيارين أساسيين و حوالى 20 معيار فرعى أغلبهم بيتمحور حوالين نقط رئيسية .. السرية المصرفية .. سهولة تبادل المعلومات الضريبية .. إجراءات مكافحة التهرب الضريبى .. معدلات الضرائب .. خطوط سير العملية الإنتاجية والشركات المتداخلة فيها .. شبكة الشركات متعددة الجنسيات فى كل بلد ..
– الشبكة شايفة إن الولايات المتحدة و على عكس النبرة الحادة اللى بتتكلم بيها وتشددها فى مسألة خروج رؤوس الأموال منها إلا إنها فى المقابل بتتساهل بشكل كبير جداً فى دخول رؤوس الأموال ليها وذكرت 3 ولايات بالإسم هم #وايومنج و #نيفادا و #ديلاوير قالوا إنهم بيسمحوا بتسجيل شركات وهمية وبيخفوا الأسماء الحقيقية لملاكها ..
– قالوا كمان إن حصة الولايات المتحدة من شركات الأوفشور فى العالم ارتفعت فى أخر 3 سنين من 19.3 % إلى 22.3 % .. بمعنى تانى الولايات المتحدة بتستحوذ على 22.3 % من حجم الأموال المهربة فى العالم – و ده أعلى معدل بين دول العالم كله على فكرة – وبالرغم من كده فالإتحاد الأوروبى أو OCED أو حتى البنك الدولى مصنفوهاش كملاذ ضريبى و ده طبعاً راجع لإعتبارات سياسية زى ما هو واضح ..
– سبب تانى بيأكد كلام الشبكة .. #قانون_فاتكا .. القانون اللى بدأ تنفيذه فى 2014 بيجبر الأمريكيين المقيمين فى الخارج على الإفصاح عن حجم أموالهم عشان يتم فرض ضرائب عليها .. واللى مش هيتعاون من المؤسسات المالية فى العالم أمريكا هتفرض عليه عقوبات كبيرة بالتأكيد ..
– سبب كمان بيوضح إزدواجية التعامل مع أمريكا وهى إن أمريكا بترفض التوقيع على إتفاقية التبادل الفورى للمعلومات مع الدول الأعضاء فى OCED و رغم كده فهى بتجبر كل دول العالم على التعاون معاها بناءاً على قانون فاتكا ..
ـــــ
* نقطة أخيرة يجب الإشارة ليها و هى إن الولايات المتحدة برغم إنها أكبر المستفيدين من هروب الأموال إليها إلا أنها مش هى الوحيدة المستفيدة من ده .. أغلب دول العالم الأول بتحاول الإستفادة بشكل أو بأخر من كونها ملاذ ضريبى حتى لو معترفتش بده .. سويسرا مثلاً و رغم إنها وقعت على بعض الإتفاقيات اللى بتساهم فى تسهيل استعادة الأموال المنهوبة إلا انها مبتتعاونش إلا مع الدول الغنية فى حين إنها بتماطل بشكل كبير مع الدول الفقيرة .. ألمانيا نفس الكلام مع إضافة إن موقفها غير واضح حتى مع الدول الأوروبية أعضاء الإتحاد الأوروبى .. بريطانيا نفس الكلام بحكم إن جزر كتير متهمة بكونها ملاذ ضريبى بتتبع ليها .. الملخص إن الثقل السياسى بيتدخل بشكل كبير فى تحديد حجم الإستفادة من الأموال المنهوبة من دول العالم الثالث و الثانى ..
ـــــ
مصر و التهرب الضريبى :
ــــــــــــــــــــــــــــــــــــــ
فيما يخص مصر فموارد مصر الضريبية ليها مصادر أساسية :
1 – الضرائب المباشرة و غير المباشرة زى ( ضرائب الدخل و ضريبة القيمة المضافة و الضرائب على أرباح الشركات )
2 – الضرائب الجمركية
3 – الضرائب العقارية
– التهرب الضريبى فى مصر ملوش تقييم دقيق و الأرقام فيه متفاوتة بشكل كبير .. #خالد_صلاح رئيس تحرير اليوم السابع على سبيل المثال قال إن حجم التهرب الضريبى يقدر ب 200 مليار جنيه .. أستاذ #عماد_سامى رئيس مصلحة الضرائب قدره ب 400 مليار جنيه .. الإقتصادى #هانى_توفيق إتفق مع أستاذ عماد فى نفس الرقم السابق .. أستاذ #عادل_اليمانى مستشار الاتحاد المصرى لجمعيات المستثمرين بالغ شوية وقال إن حجم التهرب يوصل ل 600 مليار جنيه .. المهم إن الثلاثة أجمعوا إن حجم التهرب ده جاى من الشركات الكبرى والمتوسطة و أصحاب الدخول العليا و إن الطرف الأضعف فى المعادلة هو المواطن الغلبان خصوصاً الموظفين ..
ـــــ
* إيه علاقة مصر بالملاذات الضريبية ؟
– مصر مش ملاذ ضريبى أبداً ولكن منتشر فيها ظاهرة الإستثمار الدائرى أو tripping-round واللى إتكلمنا عنها فى الجزء الأول .. الفلوس بتخرج وبترجع فى شكل إستثمارات أجنبية فى أسهم الشركة المصرية .. يكفى إنى أقولك إن دولة صغيرة زى جزر كايمن بتحتل المركز السادس فى قائمة الإستثمار الأجنبى فى مصر ومش السنة دى بس .. لأ .. ده طبقاً لتقرير أعدته #الهيئة_العامة_للاستثمار_والمناطق_الحرة عن الإستثمار الأجنبى فى مصر من عام 1970 إلى عام 2013 ..
فى دراسة كويسة جداً عملتها المبادرة المصرية للحقوق الشخصية هحطلكم الرابط بتاعها ضمن المصادر ..
ـــــ
* إزاى مصر تقدر تواجه عمليات التهريب دى ؟
1 – محاولة تشكيل كيان دولى بالمشاركة مع الدول النامية المتضررة من عمليات التهريب و عرض وجهة النظر على المؤسسات الدولية و الضغط عليها لإقرار قوانين تحجم من العمليات دى
2 – محاولة الإنضمام للمنظمات الدولية القائمة بالفعل زى OCED
3 – التعاون التام و الكامل مع اى طلبات أو شروط بتفرضها المؤسسات الدولية لتطوير المناخ الضريبى المصرى
4 – مكافحة التهرب الضريبى عامة و إقرار قوانين حاسمة تساهم فى تحصيل الضريبة من المتهربين
5 – إقرار قانون شبيه بالفاكتا الأمريكى حتى لو طبق بشكل جزئى لحين وضع تصور كامل له
6 – إلزام الشركات اللى ليها فروع فى ملاذات ضريبية بإظهار حجم أرباحها من شركاتها الخارجية و مراجعة مستنداتها طالما صاحبها مصرى مقيم على أرض مصر
7 – زيادة الضريبة المستقطعة على المبالغ المحولة إلى دول الملاذات الضريبية مع تسويتها فى نهاية العام بعد مراجعة مستنداتها .. يعنى إخصم منه بالزيادة ولو له حق رجعهوله أخر السنة
8 – لتطبيق النقطتين 6 و 7 يجب إستحداث هيئة جديدة أو حتى وزارة متخصصة فى التعامل مع الملف الضريبى للشركات المصرية فى دول الملاذات الضريبية
9 – توقيع إتفاقيات منع الإزدواج الضريبى على أن يكون للدولة الأم الحق فى تحصيل ضرائبها من أرباح مواطنيها حتى لو تحققت فى الدول الأخرى .. ده صعب جداً لكن على الأقل محاولة
10 – فى حالة عدم الإستجابة من الدول الأخرى – و ده متوقع – يجب على مصر التضييق على مسألة تحويل الأموال إلى دول الملاذات الضريبية مباشرة
11 – حظر الإستثمار فى المجالات التى تهتم بها الشركات المصرية فى دول الملاذات الضريبية و ده هيجبرهم على تغيير النشاط أو حتى عدم الإستثمار فى مصر و رغم إن ده له آثار سلبية و لكنه هيكون أوقع عند حساب حجم الإستثمار الأجنبى المباشر بشكل دقيق
ـــــ
لقراءة الموضوع على التطبيق الخاص بالكاتب على جوجل بلاى :
https://play.google.com/store/apps/details…
لقراءة الموضوع على التطبيق الخاص بالكاتب على آب ستور :
https://itunes.apple.com/app/id1432249734
ـــــــــــــــــــــــــــــــــــــــــــــــــ
المصادر :
ـــــــــــــــ
1 – دراسة المبادرة المصرية للحقوق الشخصية
السياحة الضريبية مسمار جديد فى نعش العدالة الإجتماعية
إعداد وحدة العدالة الاقتصادية والاجتماعية – مايو 2015
http://cutt.us/ST7Vx
2 – Which Countries Become Tax Havens ?
University of Michigan By :
Dhammaka Dharmapala – James R. Hines Jr
http://cutt.us/N2ApT
3 – Tax Justice Network
Financial Secrecy Index – 2018 Results
http://cutt.us/JuoJO
4 – Tax havens: the billions that get away
http://cutt.us/dmqxP